زي ما يكون روحك مسحوبة منك، موجودة ف مكان تاني... مكان مش ف الحاضر أصلاً... مكان ف الماضي، وسط شوية ذكريات حلوة ووحشة برضو... مع ناس كنا بنحبهم ولسه لحد دلوقتي، لسه مش عارفين هما حبونا ولا كنا بنضحك ع نفسنا وبنتجاهل الحتة دي كل ما نفكر فيها عشان مش عاوزين نعترف لنفسنا اننا إتضحك علينا، واننا تقريباً كنا عارفين ده وساكتين... وده ف حد ذاته جريمة ف حقك.. أنت متهم قدام نفسك...
ومع ذلك لساك لحد دلوقتي بتفكر فيهم... روحك ف غربة عندهم.. متقيد بذكراهم.. بتختلق لهم أعذار.. ولسه ف جيوب قلبك فكة أمل للرجوع.. بتكرر نفس الغلط بتاع زمان.. متعلمتش.. او اتعلمت ومصمم توجع قلبك.. يمكن غصب عنك.. أصل الهوا غلاب
بتحاول تخرج من سجنك.. تفك طوقك.. بس من طول المدة.. الأسر عندك بقي عادة.. ولسه عنيك بتحن لما تشوفهم.. وقلبك يرق لما تسمع اساميهم او تشوف حد يفكرك بيهم.. مبتقدررش تحوش دمع عنيك لما تبقي لوحدك.. يا مسكين...!!
انا مبقتش عارف انت ضحية ولا مغفل ولا ظالم ولا جاهل.. محاربتش عشان الحاجة اللي بتحبها، فخسرتها.. ولا الحاجة هي اللي بعدت عنك.. حاجة كومبليكس كده 100 حاجة ف بعض.. فيك صفة وعكسها.. بقيت مقفول بشفرة .. ومحدش عارف يحلها...
" هرتلة واحد "
ليست هناك تعليقات:
إرسال تعليق