أبيات شعر للكاتب الكبير عباس محمود العقاد 

صغيرُ يشتهي الكِبَرا ** وشيخُ ودّ لو صَغُرا

وخالٍ يبتغي عملاً ** و ذو عملٍ به ضَجِرا

وَرَبُّ المالِ في تعب ** و في تعبٍ من افتقرا

ويشقى المرءُ مهمزوماً ** ولا يرتاحُ منتصراً

وذو الأولادِ مهمومُ ** و طالبهم قد انفطرا

ومنْ فَقَدَ الجمالَ شكى ** وقد يشكو الذى بُهرا

فهل حَاروا مع الاقدارِ ** أم هم حَيَّروا القدر؟

دعوت اليوم من أجل السلام

" دعوت اليوم من أجل السلام

وجدت نفسي اليوم أدعوك من أجل السلام
غصت ف فكري وخرجت منه آلاف المرات
أعلم أنك سمعتني 
أعلم أنني لم أكن وحيدة ف تلك الغرفة
أرتجف من كثرة الخوف من الخوف
الوحدة المفجعة
دعوتك جاثية ع يدي، وعلى ركبتي.
ألصقت جبيني ف الأرض.
لو أمكني الدنو أكثر من ذلك، قسماً لدنوت.
لأن هذا هو العجز، أصدق أنواع العجز.
النوع الذي يجعلني متيقنة أن لا شيء ع الإطلاق، لا ورقة أو دمعة أو بسمة إلا بإرادته
اليوم تجلت لي فكرة
ليست للمرة الأولى
هذه الدنيا، دنيا ليست دار هناء، هي بهارج فقط
هي الدار التي تشعر فيها بالجوع والبرد
هي الدار التي تشعر فيها بالقلق والخوف
المكان الذي يعتريه البرد
شديد البرودة أحياناً
هي المكان الذي يتحتم عليك فيه مفارقة الأحبة
حيث لا تستطيع أن تتعلق بشيء؛ لأنك وإن تعلقت به فتعلقك هذا لن يبقيه، ولن يسبب لك هذا التعلق سوى الألم عند زوال ما تعلقت به
المكان الذي فيه السعادة والحزن ليس إلا لاعبين ع مسرح ينتظران فقرتهما اللاحقة..
يتنافسان على حيازة أضوائه
المكان الذي فيه تسقطك الجاذبية ويدميك العجز
المكان الذي يوجد فيه الحزن، لأن وجوده حتمي
ودموعك تتساقط لتذكرك بمكان من غير دموع
مكان من غير دموع
أليس ذلك المكان هو ما نقصد؟ أليست الجنة ذلك المكان؟
المكان الذي وصفه الباريء دوماً، المرة تلو الأخرى بطريقتين :

( لا خَوْفٌ عَلَيْهِمْ وَلا هُمْ يَحْزَنُونَ)

لكني لازلت حبيسة الدنيا، أليست كذلك؟
أثر جرحي يذكرني بذلك
الحرق الذي ع يدي ترك أثراً أحبه،
أحبه؛ لأنه يذكرني كم أنا عاجزة.
يذكرني بأنني إنسان،
إنسان يحترق. ينزف. ينكسر. ثم تبقى ف جسدي الندوب
نعم. مازلت هنا. هنا أسقط. هنا أبكي
هنا، أيضاً ملأت فراغي، وإلى التواضع رفعتي، وإلى إدراك حجم ضعفي، وشدة إحتياجي إليك
ومن ثم أنقذتني أنت من هذا الضعف
حقاً فعلت
حقاً.
مثلما أنقذت يونس وموسى وأمه، أنقذتني
أنت السلام للمسالمين
أنت القوة للأقوياء
أنت منار الحقيقة في عاصفة الأكاذيب
فوجدت نفسي أدعوك اليوم..
طلباً للسلام... "

- استرجع قلبك
-ياسمين مجاهد

سيدا - أحمد السعيد

- وحشتني .. 
- شيلت الخناجر من قفص صدري وفتحته للهوا ورجعت لأختي بسخرية قلتلها " أنتي أوحش ".
- " طمني فاضل قد ايه ؟ " 
- " لا لسه مبعدتش " 
وإيديا واحدة بتعدل الهيدفون ، والتانية شرطي غشيم بيكتم نبض قلبي عشان متطلعش الحقيقة .. 
ف لسه فاضل 672 يوم وست ساعات ونص وكام دقيقة . 

ف حاجات غلط من ضمنها 
* كدب اللي قالوا القرب بالنية 
* خوفكوا عليا من إني أجوع ، خافوا من الأكل وحديا 
* كون اللي قبلي خانهم التعبير فقالوا " كل الحاجات المؤذية ف الغربة قادرة " 
كان قصدهم ..
( كل الحاجات القادرة مؤذية )

" يا مسافر وحدك " 
مش بس أغنية.

أنا وشي حجّر من التصنع ف الصور 
وعنيا لما قلبي زغلل شفتها بتدق 
كل الحاجات - بيقولوا - حلوة ، اشمعنه أنا 
فتحت عين شباك أوضتنا الصبح خوفت بجد .. 
شافوا القصور والسيارات والروشنة ، وأنا شوفت خرسانة وناس " هي كالحجارة أو أشدّ ". 
هما اللي صح ..
اتمتعوا بالراحة والجو النضيف ، وأنا قروي ساذج ما تبستطش لما بدّلت القهاوي بالمولات .. والناصية بالتكييف.. 

وبيسألوا .. 
ايه اللي ممكن يكسرك ف الغربة دي ؟!
وانت بن شتل الرز والسوق والعتالة !!
قلت الكفالة .. 
الشبشب الباغة العبيط طيب 
السيفتي قاسية ومؤذية 
جرحت صباع قلبي الصغير لما داست بإفترا رقاب العمالة. 

نفس المكان بالظبط 
أبرهة لم يمت
الفيل بقى العمال 
واحنا بقينا السوط 
أنا كنت شاعر ف بلاد المرمطة 
إزاي بقيت جلاد ف بلد القوت 

مليت صرخت كأني بيت بتهد 
" أنا أحب أقول الشعر ف الحلوين " 
محدش رد 
" أتحبني بعد الذي كان " 
محدش رد 
" صوتك أرق من النايات" 
جعلوا أصابعهم ف تاتش الأيفونات وانفضوا من حولي ..

أمي اللي عبت شنطتي شافت 
أن الهدوم، والأكل ،والشاي ،والصابون أولى من صوت أبويا وحضنها وعيون كريم ورنا ، أو ربما .. 
- علشان مظلمهاش - 
خافت من الوزن الزيادة وخنقة التفتيش .. أول لما شافت إن ضيق الشنطة ميساعنيش 
ضحت بإني أحيا ..
ف مقابل إني أعيش ...

هارجع .. 
لأن المايه ف الحنفية لا تصلح هنا للشرب 
لأن القرب لازم يتسند بالقرب 
لأن اخواتي رابطيني بأستك لم يفكه الغُرب 
هارجع .. 
لأن لمصر ريحة وصوت ولون .. 
وعيون بتستنى العيون 
لإني مستحيل اسمح .. 
أنقط حقي ف مراتي مكالمات فيديو ، وعيالي .. 
صور خلفية ع التليفون .. 

إن جيتوا للحق بصراحة 
الوضح مش بالحزن ده 
كان ممكن أكتب نص أبهج من كده 
لكنكم ..
بتميلوا أكتر للبكا .. 
ولأنكم .. 
أنتم بكايا ، بميل ليكم ... 

فلسفة الوجود للعقاد

" ألا يمكن أن يعيش الإنسان على هذه الأرض وهو ف غنى عن هذه الفلسفة التي يسمونها سر الوجود!..

بل هي آخر شيء يستغنى عنه الإنسان. وما أنت مستطع أن تطل من هذه النافذة أو تبدأ عملك ف الصباح ما لم تكن لك "فلسفة" وجود ع نحو من الأنحاء..
قل لي: " ماذا تستبيح وماذا تحرم وأنت تنظر من هذه النافذة".. وإذا استبحته فلماذا تستبيحه؟.. وإذا حرمته فلماذا تحرمه؟.. وما حدود المتاع بالنظر فيما تراه؟ أله حدود أم ليست له حدود؟..
وأنت تذهب إلى عملك كل يوم ف الصباح، فلماذا تعمل ولماذا تهمل عملك.. أعليك واجب؟ أمناط هذا الواجب مصلحتك أم مصلحة الأمة؟.. ومشيئة الخالق أم مشيئة المخلوق؟.. وإن آمنت بهذه المشيئة أو بتلك فلماذا آمنت؟ وإن لم تؤمن بهذه أو بتلك فلماذا كفرت؟.. وإن لم تفكر ف شيء من ذلك فهل أنت إذن مثل حسن للآخرين!..
مرحلة الحياة يا صاحبي كجميع المراحل التي نقطعها من مكان إلى مكان. لا تركب القطار حتى تحصل ع التذكرة ولا تحصل ع التذكرة حتى تعرف الغاية التي تسير إليها. غاية ما هنالك من فرق بين راكبين أن أحدهما يقرأ التذكرة والثاني لا يقرأها أو أن أحدهما يؤدي ثمنها من ماله والثاني يؤدى له ثمنها من مال غيره.. وإن أبيت المجازات فأحد الراكبين ف مرحلة الحياة يبحث عن غايتها بنفسه والثاني تُوصف له غايتها بلسان غيره... "

- العقاد

أراك ف كل زحمة العالم ..

أراك ف كل زحمة العالم ..
وهذا هو الحال ف فترة الغياب .. أتعافى ببطء من جرح الفراق .. وأعاني الكثير من الأعراض الجانبية وعدم استقرار الحالة .. جسدي ليس من النوع الذي يستجيب للشفاء بسرعة .. تطول فترة نقاهته .. حالى يُرثى له للحد الذي قد يجعلك تتعاطف معي وتشفق عليّ وللحد الذي قد يجعلني أقبل الشفقة رغم أنني لا أرغبها ، بل إنني أرغب الحب .. أن تأتيني إحتياجاً لي ورغبة في ، لا شفقة عليّ .. لأن الشفقة مرادفها ضعفاً ولا أحد يرغب ف أن يبدو ضعيفا..

وحدي .. وأعلم يقينا أنه لا يوجد مسلك للهروب من الوحدة سوى تقبلها والإعتياد عليها حتى تصل للحد الذي تستطيع أن تقهر الوحدة بالوحدة .. أن تظل وحيداً حتى تصل للأنس بدون أنيساً ، تأنس بذاتك وأن تمر بكل لحظات ضعفك وحدك .. وعندها تتيقن أن هناك إحتمال للنجاة وسمة فرصة للحياة .. وإلى أن يحين الوقت .. سوف أظل أراك ف كل زحمة العالم ، ولا أعلم إلى متى ؟؟! ولكني أعلم بأن جسدي يُشفى ببطء ...

هل آلمتك وحدتك؟؟

هل آلمتك وحدتك؟؟ .. هل تشكو منها؟؟ .. تشكو الفراغ داخلك.. الفراغ يتسع.. الفراغ يقتلك.. الوحدة صعبة.. هل آلمتك؟؟ .. هل ستطلب اهتمام "أحدهم" .. ستعتاد.. سيكون ملاذك للخلوص من وحدتك للحظة.. سيملأ شيء من الفراغ.. " احدهم " لم يعد يهتم.. " احدهم " لن يهتم كما ينبغي.. سيخذلك.. الفراغ يعود.. الفراغ يزيد.. هل تؤلمك وحدتك؟؟ .. هل تشكو منها؟؟ .. أكثر...؟!!

فوضى المشاعر

كان يسير ع مهل.. فكان قد اكتسب عادة المشي بعدما ينتهي من اي يوم طويل، حتي ولو كان منهك.. فقد كان يحس ف هذا الوقت القليل الذي يقضيه ف السير بعض من صفاء الذهن وسط هذا الكم من الضغوطات، وأحياناً آخرى كان يعجبه الجو ف آخر النهار، ع الرغم من زحمة السيارات والضوضاء التي تسببها ..
ومع ذلك كان ذهنه ملئ بالتشوشات، وباله مشغول ودائماً ما كان يفكر.. يفكر كثيراً ويحدث نفسه كثيراً.. كان يسير دون رؤى .. لا يرى المارة ولا يرى الطريق.. ينظر إلى الأمام ولا يرى شيئاً من معالم الشوارع ، لانه كان ينظر إلى اللاشيء، ينظر إلى الفراغ.. الفراغ داخله..

كان أحياناً يتأمل كم هي الحياة سريعة.. وكيف تسيير بلا توقف.. وعلينا أن نتماشى معها دون أن نعطل ف الطريق أو حتي نستريح كي نأخذ أنفاسنا إن كنا متعبين.. وكم هو بطيء ولا تتلائم سرعته مع سرعة الحياة.. ولكن ما الحيلة..؟؟ ها، لنا الله والله وحده يعلم...

الله يعلم كل شيء، يعلم العقبات التي تواجهنا ويعلم ابتهالاتنا ودعواتنا ونوايانا وايضا ذلاتنا، ويغفر، هو يعلم عنا كل شئ حتي الأشياء التي لا نعرفها نحن عن أنفسنا.. وهذا هو عزائنا ف هذه الدنيا...

كانت بالأمس الامطار تغرق الشوارع.. والناس داخل بيوتها.. وها نحن اليوم، ابتعلت الأرض الماء.. والدماء ايضاً ان وجدت.. وعادت الحياة إلى وتيرتها السابقة.. عادت ضحكات الأطفال.. عادت أصوات الباعة تعلو ف الأسواق..
كان يفكر كم للأيام المتعاقبة من قوة ع أن تمحو الأيام الماضية ، وكم لنعمة النسيان قدرة أن تمسح ذاكرة المدينة .. عادت المدينة إلى سالف عهدها مهما طرأ عليها من تغير..

وسط كل هذا التيه داخله والأفكار المتشابكة.. أحس بإحساس مفاجئ.. وهو ليس بجديد.. هو احساس مؤلوف لديه، ومعتاد عليه.. كثيراً ما يأتيه.. وكأنه ضيف لابد من استقباله.. احساس الحنين إلى ماضي وإلى ذكرى لم ينساها.. وكم أن المدينة دائماً تعود إلى سالف عهدها...

خمس مشاهد - عمرو حسن

واحد .. 

أهلك 

أهلك واقفين قدام الباب 

وممرض واقف عند دولااب .. تقريباً بيحضر حقنة 

خالك بيتابع بالتليفون 

وأبوك بيرتل من القرآن " سورة الإنسان " وبيدعي ان امك تبقى تمام 

ف الكدر يبان منظر حمام وريسبشن واقف فيه شخصين 

ف الخلفية صورة الريس نفس الريس واقف متحنط بين علمين 

وف آخر الطرقة تلات ستات بيجيبوا حاجاة ويودوا حاجات 

وف وقت معين وف ثانية .. خرج الدكتور بشهادة زور ..

إن أنت بتضحك  للـ الدنيا ... 

اتنين ..

ميس نادية جلال واقفة بتشرح 
قدامها وأنت ما بينهم قاعد محتاس 
اتفضل قوم جاوب عالطول 
تتلغبط وقت ما تيجي تقول 
يضحك واحد من آخرالفصل 
تُحرج جداً وتشيل جواك 
إحراجك هو الباقي معاك من طفل قديم كان يشبه ليك 
تعرف معاليك .. كان شكلك أجمل من دلوقتي 
غيرك الوقت .. بدلك المشهد والتفاصيل ..وإن فاضل منك نص أبيح .. دايماً بيفوز ع نص جميل 

تلاتة ..

هو وهي .. 
وبتاعت الورد 
حضنها دافي وبينشع برد 
الناس محسودة بفعل الجرد 
بيقرب منها وهي بعيد 
بيبان ف الكدر اتنين ظباط 
ويبان ف الصوت تهريج وعياط 
وبطاطا بتلبس بالطو شياط 
وبتدفن روحها بدون أسباب 
واقف قدامها 
ايديك ع الباب 
وعنيك ع الشارع والماشيين 
خايف من مين ؟؟
خايف ع مين ؟ 
كلها كام يوم متكنش معاك 
وتكون مع غيرك عند النيل 
هو وهي وبتاعت الورد .. حضنها دافي وبينشع برد .. الناس محسودة بفعل الجرد .. بيقرب منها وهي بعيد ...

أربعة .. 

شكلك عجزت .. 

مبقتش خلاص عارف ترتاح

 مشروع طائر باقي منه جناح 

ومعاك أسرة بتعرف ترضيك وتعذب فيك 

ومعاك أولاد شبهك بجنون ، ف المنظر اه مش ف المضمون

 ف الأوضة مراية بحجم عنيك .. ويدوب أحلامك واسعة عليك تضحك .. تضحك وشين بيعاكس فيك الدنيا بتلعب بيك طولة

 فاضل ف الروح آخر جولة .. فاضل من كل الماضي حاجات شارع .. وبنات .. مجازيب .. وذوات وأزايز خمرة وصحبة سوء وتارخ مسروق وأغاني كتيير ملهاش أصحاب

 الماضي بعيد وكأنه سراب .. والجاي سراب هيكون ماضي .. فيدور زمبلكك ع الفاضي 

خمسة ..

للمرة التانية 

أهلك واقفين قدام الباب 

وممرض واقف عند دولااب .. تقريباً بيحضر حقنة 

بنتك بتابع بالتليفون 

وأبوك بيرتل بالقرآن " سورة الإنسان " وبيدعي عشانك تبقى تمام 

ف الكدر يبان منظر حمام وريسبشن واقف فيه شخصين 

والخلفية صورة الريس نفس الريس واقف متحنط بين علمين 

وف آخر الطرقة تلات ستات بيجيبوا حاجاة ويودوا حاجات 

وف وقت معين وف ثانية .. خرج الدكتور مهزوم بيقول ..

إن أنت بتخرج من الدنيا ... 

خمس مشاهد - عمرو حسن 

أنا الشيطان آسف - عمرو حسن

كان نام ليلتها وام كلثوم لم تنم «جددت حبك ليه بعد الفؤاد ما ارتاح ، ده الهجر وانت قريب .. قريب مني كان فيه أمل لوصالك يوم لكن بعادك ده عني خلى الفؤاد منك محروم»

كان النهار واسع كأنه حضنها
لون السما يشبه لقمصان المدارس
وكنا مارس
لا الشمس حامية ولا المسا بارد
فلا الصواب محتمل ولا الخطأ وارد
كان كل شيء مختلف
كان الشيطان معترف بكل شيء عمله
وكان .. صباح الخير
خرج الشيطان من بيته للشارع
وكإن جسمه بُن م الفاتح
كان الكافيه فاتح
والبشر قافلين
وهى قاعدة وهما مش قاعدين
اخر لقا بينهم قتلها وقتلته
كان حبها فى غيابها كانت نسيته
قعد سنة يشربها بإرادته
وبدون إرادته كان بينسى قهوته
ضحك الشيطان بالتالى للجرسون
ولم ورقه من على الطاولة
وقال لنفسه :
بعدين معاك طيب ، ماخلصنا م السيرة
هنعيد لإمتى ياعم خلى عندك دم
وكون شيطان محترم هتعيش وحيد بينهم
وهما بيك زايدين !!
ازاى هتعرف تعجب التانيين ؟!
هما الملايكة الغلابة وحفنة المساكين
وانت الشيطان الرجيم المجرم الخاين
هما الزباين هنا وانت اللى مش باين
سيرتك جناين بترويها النميمة عليك
وانت اللى طيب زى قاتل تاب
خرج الشيطان وقتها ثم رد الباب
بدأوا الزباين نمّ تانى عليه
ثم استعاذوا بالإله منه
الوقت جرّاح له تاريخ مضمون
يوسف نسى لاخواته مايضمرون
رغم انهم ألقوه فى بير قاصدين
(وجاءوا أباهم عشاءً يبكون)
الوقت أكتر حرفة م التبرير
ماتقولش إنك كنت كما يوسف
يكفى انهم أنكروا يوم ما اترميت فى البير
كفاية نظرة عينيهم مكسوفين منك
بيحدفوك بالطوب ف مواسم الجمرات
وانت اللى نخلك زمان رطّب لهم تمرات
وانت البسيط المُحاط بدواير الكركبة
(إذ قال يوسف لأبيه يا أبتِ إنى رأيت أحد عشر كوكبا)
قالك أبوك ماتقولش حلمك حكيت
وكتمت دمعك من الجميع وبقيت
شلال بكا نازل لجوه شديد
لو شافوا عينك يعرفواالتجاعيد
وان شافوا قلبك يفهموا ليه بكيت
مرّ الشيطان بالليل والدنيا مش هي
كان قتيل قاتل
و كان وتر فى القانون ضل عن أهله
كلٌ مسيّر للى يستاهله
مرّ ف شوارع تشبهه جداً
شايل ف ضهره ذكريات فاتت
شايل مشاعر حبها وماتت
زى البلاستيك لما يطرح ورد
اللون مزهزه بس روحه فشنك
مر الشيطان الوحيد ثم قال بهدوء :

طوبى لكل وحيد بيصاحب الدنيا
طوبى لكل الصامتين جداً
كل اللى ضحكوا من وريد مقطوع
طوبى لكل فتاة خانها اختيار الحياة
لكل صاحب حكاية عمره ما حكاها
طوبى لنفوس فيه ذكرى جواها
وتبان بتضحك ف الصور بالكدب
طوبى لكل شيطان لم يؤذى غير نفسه
والله يسامح ملايكة ما أذوش سوى الشياطين
ازاى باحبك كده ... 

وازاى رأيتك أمى ف دنيا ما اعرفهاش
حضنك سرير وانا طفل وقت النوم

الدايرة لما تضمنى إنتي
والبحر لما يردنى إنتي
وانتى الحاجات الصح ف دنيا غلطاتي
انتى الحياة اللى داخلة بحب فى حياتي
أنا الشيطان آسف
على إنى ما عرفتش أبقى كما شئتي
انا شخص صالح ماشى بخطيئتي
باكتب أغانى يرددوها الناس
شاعر صبح شارع
سكنوه بشر تانيين
واد ابن نكتة ومغنِّى بس قلبه حزين
وشيطان ف قلبه آمين
وف ضحكته شكراً
مر الشيطان والليل
أوشك يكونله نهار
رايح لبيته والصحاب ناموا
رايح يواصل باقى أحلامه
ويقول ياليل بكره تكون أجمل
بكره تكون أنبل
بكره البشر تحضنك حضن بصراحة وقُرب
وبكره تمشى بدون ماتخاف وجود الغُرب
وبكره ممكن افوق ألقاكى فى نهاري
وألقانى طير اتكسر وطلعله بيكى جناح
كان الشيطان بينام
وأم كلثوم لم تنم
«جددت حبك ليه بعد الفؤاد ما ارتاح»

أنا الشيطان آسف

- عمرو حسن 

قصيدة هيبتا - عمرو حسن

نبدأ منين ؟
من صدفة ف الشارع
أو شارع الصدفة
أو أي شيء مدهش بيتم بين اتنين ..
من إلتقاء العين
أو من حاجات تانية ..
نبدأ من الدنيا
على إعتبارها كمين
بين احنا والتانيين
ويبدأ التدوين
من أول السيرة ..
الصدفة تجمعنا
زي اللي خارج من كافيه بالليل
يخبط ف كتف مهندسة بترول
أو عاملة ف مصنع
تسقط مابينهم اغنيات صدفة
لا يوطوا يجنوها ولايسيبوها تكُف
 تنمو هنا شجرة مجهولة المصدر وشكلها مختلف
تكبر بفعل الوقت
وتصير مخازن للطيور والقش
البذرة صدفة والفروع علاقات
بالتالي ياحضرات
لا تُهملوا الخطوات أو تمشوا مش شايفين
هتدوسوا على علاقات وبواقي بني آدمين
فـ توخوا بعض الحذر .. 

فـ توخوا بعض الحذر .. 

او إمعنوا ف النظر
جايز تشوفوا اتنين واقع مابينهم شيء
هيكون لبكره طريق
يشبه طريق بكره
واتأملوا الحكايات
اتأملوا الحكايات
في الدنيا ياما حاجات أبسط من الرؤية
فبنمشي مانشوفهاش
شجره هنا بتكبر بين حد جه وماراحش
وحد راح وماجاش ... 

اتنين ..

ايه اللي ممكن يبقي عاقل بين
واحد وواحدة بييجوا من طريقين
بيقابلوا بعض ف غفلة من العالم
من غير سبب واضح وبدون قدر مُعلن
يتقابلوا فعلاً
مقابلة ناي لشخص حزين
كاسرين حدود المنطق السائد
والمشهد الباهت عن منطق العلاقات
بالتالي كان لازم يسود جنان مطلق
حضن ف مكان غامض
او ضحكة ورا شباك من شمس اضافيه
اتنين بيستخرجوا من جملة فعليه .. هو بخيال هي 
وفجأة يبقى الكون داير مابينهم بس
بقى فيه حاجات تتحس
بقى فيه أمل ف الجي
كل اللي بينهم نيّ .. يصبح حقيقة وجد
من غير مايعرف حد
وبدون مايفرق حد
حُب ببراءة وطيش
شيء انكتبله يعيش
بطبيعة المجانين في خيال مريض عادي
كان حبها فجأة
وقال لها فجأة
فقالتله بالتالي .. انت اللي ف خيالي
ولحد هذا الوقت
لا كان مابينهم حساب
ولا أي شكل عتاب
ولا مشكلة ف الوقت
بينهم سحاب ناعم معجون بمزيكا
وكلام خفيف كالريش
بينهم
حاجات هتعيش ..

تلاتة ..

بدأ المُحب يجرب الاشياء بطبيعة الاتنين
كل شيء واحد
أصبح جسد بروحين
تتقسم التفاصيل
فرعين لنفس النيل
وتبتدي الحكايات  تطرح حاجات بالنص
اول كتابة ذكريات بينهم
شيء انفلت منهم ببساطة الفلتان
فاستكشفوا الألوان
واستكشفوا الدنيا بمهارة الانسان
نما مابينهم ليل
وكلام بسيط وجميل
واغاني وشوارع
نما جدار منقوش
واتنين مابيحبوش الا الحاجات مع بعض
الا اللي كان بيسُر
نما مابينهم وعد
والوعد
دين الحُر .. 

أربعة .. 

فيه حاجات كتير بينهم
غابت قصاد عينهم
زي اختلاف المسمى واتفاق الاسم
أو زي فرق المكان
والقرب والخذلان
وقد رأى الاثنان بعض الملايكة ف بعض
بالتالي كان لازم يحصل مابينهم شرخ
يا يوسعوه أكتر 

يا يجملوه أكتر مع كل يوم بيفوت يظهر خلاف أكبر
وتبتدي التجربة
تستنزف التجربة

خمسة ..

لابد نفهم شيء
ان الطريق الممهد غير جدير بالحب
وان الاضاءة الشديدة قد تضر العين
لابد كانوا يعرفوا ان الحقيقة اتنين
بعناية الجراح لو كان معاه مشرط
لا يفوت ف عمق الجرح ولا يهمله طبعاً
فيه اختلاف لا خلاف
فيه احترام لتاريخهم الفايت
وتبتدي الأيام تمر بينهم همّ
وتبتدي الأشياء تطرح حكاية أهم
العشق بعض الحب
والحب في معناه
هو اختيار الحياة بشريك مايشبهناش
الحب تحويل الألم لأمل
عشان يتعاش

ستة ..

علشان كده غنوا
رفض المحُب حبيبُه يكون بعيد عنه 

علشان كده غنوا
الدنيا من غيرك ولاشيء يا شيء فيا
علشان كده غنوا
وصبحوا أغنيه
واتعلموا يزرعوا ورد ف مشاعر بعض
فيه كلام جديد اتولد
مش زي بنت وولد
او زي عشق خيالي بيطلع السماوات
فيه كلام جديد اتولد ينفع يشيل حكايات
ازاي نراعي المسافة مابيننا ونقدّر
وازاي نعالج نبات نزف اللي كان اخضر
الحضن نقل المواجع من مكان لمكان
من غير مايتكسّر شيء انتقل بينهم
وبدون مايبقي جدال بين خلق بيمثلوا
علشان كده غنوا
وعشان كده كملوا

سبعة (هيبتا) 

بس الحياة حلوة
بكل مافيها
بكل مواجعها وبكل مقاسيها
وبكل مفاتنها وبكل شكاويها
بس الحياة حلوة
حين نكتشف جرحنا ونطيبه بهدوء
ونسامح الأشياء بطبيعة الأشياء
ما بين لقا وفراق
نمسك بايد من خوف علي ناس يهمونا
ونحب خطأ الغير علشان يحبونا
زي اللي بص ف طفل يشبهله
وف عينه ضحكه لأمه تفهمها
زي اللي عنده حاجات بيقسمها
مع واحد تشبهله علشان ماتشبهلوش
مع واحدة غنيتله وكمل الغنوة
لسه الحاجات قاسية
بس الحياة حلوة.

هيبتا - عمرو حسن 

بكتبلك قبل نهاية العالم بدقايق - عمرو حسن

باكتِبلِك قبل نهاية العالم بدقايق ..
قبل الجنرال ما يسيب القاعة ويدي أوامر بالضرب ..
قبل ثواني من الحرب ..
باكتبلك .. وايديا بترعش م الخوف والبرد ..
شوفتي العالم ياحبيبتي ف سن الشيخوخة !!
صف كمنجات مكسورة ف روح صبار ..
الدنيا بتتحول من زرع البذرة لضرب النار ..
وانا وانتي صغار جداً ع الموت ..
وكباار ع العيشة بدون مزيكا ودون أشعار ..
وبدون ما أحلفلك ان الكمنجة خالفها الحظ ف هذا الوقت
بحلفلك انك أجمل من تشرين التاني .. 
أجمل بكتير من صوت طيارة " سوخوي " ياحبيبتي ..
وعيونك أجمل من كل عيون القادة ف كوكبنا الشرير ..
خليهم هما يواصلوا التنديد والزيطة ..
وتعالي ارسملك ع الحيطة ..
وردة هتكبر مع كل اتنين هيصارحوا لبعض بمشاعرهم ..
ارسم أمي ف كامل غربتها ودعوتها ..
ارسم بيتها ..
وارسم تعريف أوضح للدين ..
جامع مانع ع البني آدمين ..
والدين أبسط من فرض الدين ..
ربنا أكمل من تدوينه ف بطاقات تعريف الشخصية ..
ربنا نيّة ..
فطرة بتجعلنا نحب الورد بدون تمييز
وبتجعلنا جميعاً نِكرَه نصل السكين
باكتبلك .. قبل نهاية الكون بدقيقة
خرج الجنرال من أوضته بيلعن ف التانيين
أدى أوامره لسرب الطيران بإزالة دولة من المشهد
الدنيا بتخلص بالتدريج
صحابي مابيكفوش تهريج
البيرة حلال .. هتف السكران بره الحانة والعالم حزن ودخانة
البيرة حلال علشان بتجمّع ماتفرقش
والموضة حلال
والعزف على البيانولا حلال 

الرقص بدال الموت ف الحرب الشرق مخازن عند الغرب
والدنيا  البكرة الخيط بتلف
وعيال المستوطن بتِّتف
ف حضور قمة دول العشرين
أديني كتاب ومدينة بعيد عن مرمي النار
هابنيلك دار تسكنها ياصاحبي ف أي أوان
واديني مساحه من الالوان
هارسم علمي موازي لعلمك
وامسك قلمك وأشعر بسعادتك وبألمك
اشمعنى بنتشارك ف الموت
وف سعر النفط العربي الخام
وسجاير كوبا الشايبه حروب
اذا كنا بنتشارك ف الطوب
خلينا نقيم للحب جدار !!
من سوء الحظ مافيش جنرال
يفهم ف كلامك وكلامي
باكتبلك وف قلبي سلامي
لبلاد هتتابع بعد قليل
تحويل النيل لوريد مقطوع
ودخول العالم ف الممنوع
حسب المشروع التمهيدي لنهاية الكون
مشروع صهيون ...

باكتبلك قبل نهاية الكون بثواني
مش وقته نقرر مين فينا اللي ابتدى يضرب نار ع التاني
ف مطار مجهول ف بلاد ساقعة
كان فيه عشرين طيار جاهزين
يبدو الجنرال ف الماستر سيين قدامه زراير ومساعدين
ووراه الاخضر بيعيّط على عزف حزين
حيّاهم بلغتهم بهدوء
ثم اتجهوا بدورهم على فوق
وابتدا لون الازرق يزداد وموتور الطيارة بيعلى
العالم كله بيحشد نفسه لنفسه لضرب الحرب
العالم كله بينظر للارهاب من نظرة عينه الشخصية
العالم بقا نفسه ضحية
العالم قاعد ع التليفون بيتابع أخبار القتلى
وبيحسب هل عنده مقاتلة تنفع لإزالة نص عدوّ
كان صوت طيرانهم مالي الجو
وانا وانتي غلابة ومش عاوزين
غير ارض تساع البني ادمين
من غير أحزان 

أو لون بشرة
من غير أموات جوه النشرة
عاوزين نصحى ف عالم أخضر
ننجب أطفال
ونصلي كما شئنا نصلي
نغني ف كورس للانسان
بقا يعني مافيش ف الدنيا مكان ينفع للناس الغلبانة !!
انا هاخد أسرتنا معانا
هاخد أمي واختي واخويا
والصورة اللي فاكرها لابويا
وانتي معاكي أبوكي وامك
وعروستك وكتاب التلوين
وهناخد حفنة ميه وطين
وهناخد كلبي وقطتكم
وهنعمل بيتنا قصاد بيتكم
ونعيد تشييد الكون بهدوء
مش عاوز افوق والارض بتهتز علينا
والسما ألوان من خوف وقتي
باكتبلك والكون دلوقتي
على وشك الموت المجاني
باكتبلك ..
قبل بداية الكون من تاني ...

بكتبلك قبل نهاية العالم بدقايق 

- عمرو حسن 

السيرة الذاتية لحي الزمالك - عمرو حسن

دي مش فيونكة ..آآآه .. دي بواقي تجربة إنتحار فاشلة .. قولتلكوا 100 مرة متدخلوش الرئة من غير ما تستأذنوا .. القرب كل ما بتعطاه بدمنه .. والشك زي المسدس بس ناقصه رصاص .. فييه 3 ماتوا ف جسمي معرفهمش .. يمكن عارفهم بس مش فاكر أو كنت فاكر إني ما أعرفهم .. ماتوا ف مكان بالقرب من القاولون فصاحبت بنت SpazmoDyjstein .. فضلت معايا مسكنة لألم اول ما مشيت صحيوا ناس تانين .. لا بحب أعيط جماعة .. ولا أحب أعور خد .. قلبي بجد عمال ينزل كراسي لناس ميعرفهاش .. قلبي اللي خلف أمل من واحدة محضنهاش .. بتحب ليه سيما .. اسأل محمد خان .. واسأل صبي حبها وده وداها روحه اتخان .. بتحب ليه الشتا .. اسأل بقى الدخان .. اسأل خيوط الصوف ف البالطو هتقولك .. لولا الشتا ياصديق كنا أتحرقنا حريق .. لولا الالسجاير والغنا والبن كنا صبحنا حطام .. أو صنف من الأصنام معمولة من العدوى .. ولولا أحمد ذكي وسناء جميل مثلاً .. كنا بقيت حديد أو علبة اسطوانات .. لكن لحسن الحظ والخبطات .. ربك جعلنا غلابة بالفطرة .. عشان كده كل اما اجرب الانتحار بفشل .. وبتدخلوا الأوضة وانا بقول أكشن .. فبتحسبوا المشنقة من جهلكوا فيونكة .. ودي مش فيونكة ..

خد من عمري .. عمري كله إلا ثوانِ أشوفك فيها .. الشوق .. أأه من الشوق .. عارف يا عم .. مش عارف أنساها .. حقنة مخدر بتجري جوه شرياني .. بفضل فريسة مابين أنا وانا التاني .. المشكلة التفاصيل .. وقد ايه ف حاجات بسيطة ومركبة .. صوتها القديم اللي حافر منطقة ف الروح .. ريحة بنفسج ف الشتا هي .. وجع الأغاني ف اول مرة من غيرها .. مش قولت هتجرب تدفنها ف الراديو .. ماتت وصحيت مرتين ف يومين .. عارف يا عم .. أنا عايز أنساها .. والفرق شاسع ما بين عارف وبين عايز .. 
طب هي مش شبهي .. هي مش شبهي .. لا هي أمي بتغسل الأوجاع وتبوس جبيني ف كل لقا ووداع .. ولا هي فاتن حمامة ف فيلم عربي قديم .. إزاي بقى منساش ؟! 
كل اللي قالوا نسينا .. مش ناسيين .. رغم اليقين أننا ع بُعد مش هين .. ورغم اني عيني ابتدت تضحك ولا تبين .. فيه بعض أشيائي فقدها لقيتها .. حزني عشان تضحك .. أو حزن ضحكتها ..أو ليل قديم شتوي مرينا فيه اتنين ضلين ع الممشى ف الشارع الساقعة ومشروبين سخنين ف بخار بريحة حضن .. ألم يكن يكفي أحزن كـ هذا الحزن ؟! 

أنا ..أنا مش كئيب والله .. صدقني .. أأنا بس حزني الخام نسبة كحوله كتير .. لكني بعرف أطيير وبعرف أضحك كويس .. وبعرف أحفظ أغاني وأمشي أرددها .. زيي كـ بعض الناس وكل برج الأسد .. جواني ع الآخر وعلاقته بالأشياء كـعلاقته بالأسماء .. وعلاقته بالتفاصيل هي الحياة ذاتها .. علشان كده بسكت .. عشان كده بنعزل أوقات بدون داعي .. بنزل ع الشجر من قربي ووداعي .. وببص للعالم من خرم ف الذكرى .. ف ناس تعيش ناسية وناس تموت فاكرة .. وفيه خلق بين الإتنين بيعيطتوا بالعين وبيسرحوا بالروح ويعيشوا ع تفاصيل هما اللي عايشنها .. عشان كده ربنا خلق العياط والحب .. خلق الألم والحضن .. وده السبب ف إنتماءنا لسماعات الودن .. بالتالي ظهر الغنى .. ثم الإضاءة الحزينة .. وحاجات كتير تانية .. زي الزمالك ما بينا ف شهر أكتوبر ..زي الكمانجة وزي .. كل اللي مالوا .. زي الحنين الحي .. أو زي ايه تاني ؟؟ .. زي اللي جه ينتحر وقرر يعيش تاني .. 

السيرة الذاتية لحي الزمالك 

- عمرو حسن 

جوابي الأخير - عمرو حسن

جوابي ده الأخير .. جوابي .. ده الأخير ليكي .. يا معاليكي .. يا ست الحسن .. يا سبب الحزن والعلة .. يا شجرة حسبتها ضلة وطلعت نار .. مساء الخير ع الأزهار ع خدودك ..مبنجرحش .. ومبنسمحش حد يقول كلام عنك .. لذلك ، ثم أما بعد .. 

أنا الطفل اللي كان ف عنيكي متشعبط .. يشوفك روحه تتلخبط .. وقلبه من الحرام يضعف ويستعبط .. كأنك زار وأنا الدرويش .. كأنك غار وأنا الحرافيش .. كأنك كنتي قرش حشيش دخل رئتيني وملاني .. كأنك دار وانا ماليش سوا الدار اللي لماني .. بغض الجرح مين خان مين ؟! ومين قصر مع التاني .. وغض الطرف عن اسمك وطعم خروجه ف لساني .. أنا مليت من القصة ومن لعبة خلاص لسه .. لقيتك غيمة ف حياتي  حسبتك مطرة قمت جريت .. وفجأة لقيت مفيش غير ليل .. سحابة ضلمة كنتي أنتي .. أشوفك ف الوجع بنتي .. وأحسك أرضي وسفينتي وشمس بتملى ليلي شروق .. مفيش كام يوم لأني بافوق واشوف القاتل الفعلي .. لقيتك أرض ماتضمش سوى المطاريد .. وانا عيل بيفتح إيد يشوفك خطك على كفه .. عنيا عيال اذا بصيتي يتدّفوا .. حسبتك أم بتدوّر رحى .. الأحضان على عيالها.. لقيتك ماسكة كاتم صوت .. رصاصك فات وجع جواي .. وهو ياحلوة يعني الموت .. بيفرق شكله كان ازاي  .. 

وهو الجرح للستات ومش لينا ؟! .. ما فيه رجالة بتعيّط .. وفيه رجالة بتفكّر ف عز الليل ف ناس باعوا .. وفيه راجل اذا فات ف المحيط وجعه مابيساعه.. وفيه بكره بيتشخبط .. وفيه بعناوين بتتلخبط .. .. وفيه أطفال مايتولدوش ف مستقبل ماجاش قدام .. وفيه زفة مابتقومشي .. وفيه فرحة مابتدومشي .. وفيه نغزة ف صميم الروح .. ما دام ف القصة فيه دابح ، أكيد ف القصة فيه مدبوح .. 

ولو كان القتيل راجل .. فـ دمه بيبقي مش بالسهل .. خسرتي معاه وجود الأهل .. خسرتي الحضن واللمة ..  خسرتي الضهر والضمه .. وبكره هتندمي لما .. تحسي البرد من دونه .. ياريتك شوفتي ف عيونه حنان الأب .. أنا الشخص اللي كله عيوب .. لكن مليان حاجات تتحب ....

عملت حاجات .. عملت حاجات لأول مرة بعملها .. وكِملِت أغنيات بيكي لأول مرة اكملها.. اشِمِّك ريحه وانا ماشي .. وأقول ماشي .. واكلّم ربنا عنك وجع وغروب .. عكستي المشهد المكتوب.. ماكانش الفيلم دي نهايته .. كده الكاتب لعب ف النص.. وفيه لزق ف حياتي وقص .. وفيه تركيب لناس تانية .. فيه مشهد خارجي مش محطوط .. أنا وانتي .. ومطرة بتغسل الشارع من الاحزان .. حضنتيني زمان ومكان .. وقولتيلي مافيش غيرك .. نزلت ف لحظة على ركبي وانا ف ايديا كام وردة .. ضحكتيلي .. وطبطبتيلي علي خدي .. كانك كنتي بتعدي على قلبي بروح حافية .. مسكت الدمعه من عيني .. بالعافيه وضميتك ف عز البرد .. لقيتني الفيلم بالكامل مافيش ولا لقطة ماسك ورد .. طلع فيه حاجات بتتصور وتتقصقص من المونتاج.. وأول ما المطر لمسك .. لقيتك دوبتي ف المكياج .. عروسة حلاوة أو صورة .. ملامح فازة مكسورة ف اخر جزء ف الذكرى .. خسارة تكمّلي بكره .. يا نور ساطع بيعمي العين ما بينوّرش.. انا هافضل كده عيّل ومابيكبرش .. وبكره يجوز تقابليني ف أي مكان .. هاشوفك وقتها دخان .. بقوة ست هاعشقها ف زمان تاني .. ولمسة طفل يشبهني مايشبهكيش .. انا جوايا كام ميّت وحابب اعيش.. لا هاتحوّل .. ولا هارجع من الأول .. ولا هاكتب عشانك شعر .. هبيعك دون نظر للسعر .. مكانك وردة ماسقيتهاش ف دبلت من خريف موجوع .. دموعي رصيد باحوش فيه لناس مستاهلة مني رجوع .. وحلمي معاكي م الأول  خطيئة لابد اكفّرها .. رميتك طفل ببراءته  ندم على حاجة وكسرها .. يا أوحش حلو كان فيّا .. يا أطيب شر ف النية .. كسبت حاجات تسيء ليا .. وجه الوقت اللي انا اخسرها ...

كمان : بدر مصطفى
ناي : محمد مصطفي
ايقاعات : كريم صلاح
كيبورد : صهيب النجار
تسجيل : من حفل الساقية اكتوبر
رؤية موسيقية : الفنان محمد مصطفى

عارف ساعات

عـارف سـاعات لما تلاقيـهم قـربوا ف تخـاف تقـرب
فـا يزيدو قـرب ومشـاعرك يستغـربوا فا تقـول نجرب
ويتقلب القرب حب فـا يبعدوا فتخاف تعاتب وان عاتبت يعندوا

وان سكت العيب عليك ف تقول ف نفسك بكرة يجى حد تانى يحس بيك
عارف ساعات بتبقى مش عارف تفرق بين الكلام وبين السكات
فا تختار تبوح وسط الكلام صوتك يروح فا عنيك تدمع والدموع تشيل الكلام
وتبقى خايف حد يسمع فاتمسحها بمنديل اوام وتقول فى نفسك ايه اللى فيها بكرة نفسك حد يجى يحس بيها

عارف ساعات تبقى وحدك وسط لمة تبقى وحدك وسط ناس
يمكن عشان فى الناس دى ناس كانوا معاك لكن خلاص
تبقى كاره وحدتك وكاره القاعدة وسطيهم
لا تبقى عارف تعيش وحدك ولا حتى عارف تعيش ليهم

لما تتعب من التفكير بتقول كلام اتقال كتير . بكره يجى حد ليا ويبقى عندى غير الغير ..

عارف ساعات لو .. على الساعات فا كتير اوى ولو ع النتيجة فا واحدة بس
النتيجة بتبقى بكرة حد يفهم او يحس .. 

كلمات: رووان صقر
اداء صوتي: زينة قُطري

وما أدراك ما الفوبيا

بقيت عادي
كإني ديكور
مابتكلمش عن حاجه ومابعلقش
ومبكدّبش حد ف شيء ، ومبصدقش
ومش مهتم بالدنيا ولا بالحرب
ومش باحزن على الرايح ولا الآتي
ومش حابب ادخّل حد ف حياتي
بقيت مابقيتش من ساعة وجع ف الروح
ولا شرير ولا طيب ولا حساس ولا سادي
بقيت كما طيف
بقيت كما ضيف
بقيت ،، عادي

على الحال ده بقالي زمان
بقالي كام سنه يمكن
ماحدش منّكم خد بال
روبوت تشغيله بحجارة
وطول ماحجارته فيه شغال
شجر اخضر ما بيجرّحش عين الناس
فانوس بيقيد ونوره سبيل
ده مش تمثيل
ولا تطويل ف مشهد ما
لكن اسلوب وشكل حياه
فماتلومنيش علي غيابي انا موجود
ف اعيادكم
واحزانكم
صديق ف كافيه بيسرح ف اللي ضاع منه
شريك منزل
نزيل غرفه
وجع بيبص م الشرفه
انا موجود ومش بفسد فرح بينكم
ولا بزعل قوي منكم
انا على غير ما جوايا
مهرج باسعد الشله
وصاحب افيهات حاضره
وعامل لجلكم حضره
تقولوا ف وصفها الله
فلو وجعاكو كلمة آه هابطلها
يومين عزله واكون احسن
وهارجع تاني للشكل اللي كان بادي

انا عادي
فخد راحتك
وقول عني اللي بتقوله
انا وكتير من الناس اللي بقوا زيي
مابنقربش م العالم عشان يحلو
ومابنفسدش ابدا جو
ومبنأذيش
لكن بنخاف من التجديد
من الناس اللي بيخشوا الحياه فجأة
وبيفاجئونا بوجودهم
عملنا سياج علينا عشان
ماتتعشمش ناس فينا
ف كل مساحه تلاقينا
نميل لاغاني شتويه
ولون غامق ف لبس عتيق
ريحتنا بيوت فارقناها
هدومنا ناس قلعناها
وسمّيعه
بنعرف نكرم العالم ونقراهم
مبنملش من الحكايات
ولينا ف كل صدر نبات
ولينا الجدعنه الكامله
ماننساش عيد ميلاد صاحب
ومبنبخلش بالمواعيد
جدير بيكم تساعدونا
تغنولنا
وتحكولنا
وتسقونا
يجوز دون قصد تحيونا
وتدونا امل ف الضي
يجوز نتراضى على روحنا
ونتطمن لبكره الجي
يجوز بالوقت نتطمن
ونرجع نبتسم عادي .

#وما_أدراك_ما_الفوبيا !

أيتها الغائبة

مساء الخير أيتها الغائبة الحاضرة ..
أخبارك ايه وانتي بعيدة.. اما بعد..
الدنيا من غير حزينة .. الدنيا من غيرك سكون .. غيابك بيثبت حضورك.. وانتي لساكي عنيدة.. وانتي لساكي حبيبة.. سايبة طيفك ليه معايا.. سايبة صورتك ف المرايا.. سايبة همسك ف المنام... سايبة ذكرى حلوة ف كل غنوة عاشت موقف معانا.. بعدتي ليه وسبتي قلبي.. زي طفل عمال بيبكي.. طفل تاه جوه قلبك.. ولما إتعود حنانك.. فجأة غبتي..

غبتي.. وغيابك بيثبت حضورك ف كل يوم وكل لحظة.. غبتي انتي، وبعدتي بس انا منستش.. بيقولوا كتر البكا بيعلم القلب الجفا.. وانا من كتر ما بكيت.. حنيت.. قلبي خايب .. قلبي خاين ، خاني مع أول غياب ليكي ورغم انك مشيتي .. مش راضي يبطل حنين .. بيحن لناس اصلاً مش بتفكر فيه .. وكل ما يزيد غيابك.. يزيد حضورك..

مين اللي قال ان الوقت بينسي .. ؟! كل اللي قالوا نسينا منسيوش ..كل الحاجات العكس بعضها بتقوي بعضها .. ودي عظمة الأضداد .. يعني .. ؟!! يعني لما أقول انا نسيتك ابقى منستكيش .. أنا فاكر أيام بالملي .. أنا فاكر كل التفاصيل ..

بعد فترة من الغياب .. بحاول أتعايش بقى واقعد مع ناس .. سماع اسمك ولو صدفة ف حديث عابر ،له وقع غريب ف نفسي .. بحس برعشة من جوه .. وفجأة كل الكلام يصبح تراتيش .. وكل اللي حواليا يبقى ضباب .. وفجأة كل اللمة تبقى مفيش .. وأغوص ف عالم تاني .. كله خيال وسراب .. كله أنتي .. ولما أفوق من تاني ،ألاقيكي مش جمبي .. ألاقيكي لسه بعيدة ... !!

تفرانيل 50

تفرانيل 50 لــ مصطفى إبراهيم ..

أنا بفضل دايما للآخر
ف جيمات الكونكان والشايب
و ف كشف الحاضر والغايب
وف حجز شقق مصيف بلطيم
أنا آخر تايب في اصحابي
وآخرهم ف الصلا ف التسليم
وف دور المدرسه في التطعيم
وفي وقت السين
أنا آخر جيم
أنا جرح قديم...كان متغطي
إكمني مشتي ولابس كم
سبتني الدنيا بستين أم
وسبتلها ميت مِلّه ودين
ولحد ماتميت ست سنين
أنا كنت بحب البني آدمين
وكرهت الناس من بعديها
علشان نسّوني أنا أصلاً مين
مش فاكر إمتى حقيقي بدأت
إنما فيه فتره فاكرها طشاش
كان فنجان قهوتي مابيفضاش
وبكلم ربنا طول الوقت
عمري ماصدقت بنات غير ريم
ويمكن دلوقتي ما اصدقهاش
آخر مره
شفتها فيها
كانت تقريبا بتعزل
و كان فيه سواق تاكسي منزل
ف شنط ناس حتحل مكانها
ووشوش بني آدمين معرفهاش
أنا ريم يمكن كانت قدي
أيامها... لكن دلوقتي أصغر
عارفه إن أنا يوميا بكبر ؟
وبعجز إكمني مابنساش
أنا فاكر أيام بالميللي
أنا فاكر أيام بالتفصيل
أنا فاكر يوم دفنة أختي
حتصدقي..؟ أكتر مافاكرها
وساعات بنسي ف ليله كبيرها
أنا فاكر شقة قصرالنيل
ومش فاكر حد من السكان
من صغري وعمري مابنسي مكان
أنا أصلاً فاكر بيت شادي
مع إني مازورتوش غير مره
بأمارة فيه برواز بره
كان جواه صورته ف إعدادي
كان لسه ساعتها طالعله شنب
وأنا حاسس إني طلعلي أتب
من تقل الشيله و م التفكير
معلش أنا آسف برغي كتير
وبسف ف وقتك وف وقتي
أنا حاسس بدماغي بتتقل
أنا نفسي أنام
أنا عاوز أروّح دلوقتي
متشكر جداً ع الجلسه
حنكمل إمتى علاج طيب ؟
لازم حنشوف بعض قريب
أنا ماشي...
سلام.

كما يليق بوردة - عمرو حسن

لو كان بإيدي يارب أتحول كمانجة ..
لو كنت أغنية يارب أو رواية
لو كنت ممكن أكون جنينة أو مطر
كنت هعرف أعبر أكتر عن مشاعري
يعمل إيه دلوقتي شعري
 لو حاولت أكتب قصيدة عنها
أنت يارب خلقتها وأدتني شعر مكفهاش
إزاي أقابل زيها ومكتبلهاش
أدي حكمتك

دلوقتي وانا واقف هنا ف مكان بسيط يشبهلها
مستني أي بداية تنفع عنها
نزلت قاعد من ساعات
نزلت غرقان ف السكات
بشرب ف شاي ومسكنات
وبكتب كلام وبشخبطه
أدي اللي قضى طول حياته بدون حوادث
جاتله واحدة تخبطه
وتلخبطه وتفنطه ويرجع جديد
وانا مش حديد
يارب .. العدل
أضعف من قلوب الأمهات
أنا بيت مقفل بس كلي بلكونات
أنت يارب خلقتها شجرة
وخلقتني محتاج لضل وأمنيات

ليها مزاجها الخاص
خوفها ..وحزنها .. وبراها ..
بتخلي الحاجات ترتاحلها
ماشية بخفة على الحنين وكأنها
حضن المطار بعد الغياب لسنين ..
أمشي ف الشاعر لآخره
وأنت تعرف هي مين ..
سلة النعناع ف حجر الريح
أو صوت موسيقى قديمة ف بيوت من خشب ..

بقول لنفسي
أنت محظوظ الحقيقة
تلقى طيفها ف المكان اللامكان
جوه شارع شك وكمان إنتظار
الفجر
عربون النهار
أنت وجمالها وحزنكم
قاعدين ف ركن لوحدكم
إتلوا السلام ع حسنها
واعزمها ع شاي بالحنين
كلمها عن طفل انت هو
عن أمك ..
وعن فوبيا الأسانسير القديمة
وعن برشام ملازمك من 15 سنة
واستخدم " إحنا " مكان " أنا"
أو زي راجل قولها
إنك بقيت محتاجلها
وإنك تحب تموت ف بيت من حضنها
ساعتها قولت
بحب الشبابيك الخشب أكتر
وأحب ألوان المعيشة دافية أكتر
كلب طيب ف التراس
بورتريه ف الصالة من فنان صديق
وبخور مفاجيء عند باب البيت
ما أفسدته العلاقات القديمة
تصلحه أحلام جديدة
طيبة ..

ع أي حال ..
مهتم أقول كلمة أخيرة للتاريخ
أنتي أجمل ست ف العالم عموماً
أو عموماً ، أنتي أجمل ما رأيت
بنت بيت ..حتى ف جنانك يا ستي
عصبيتك ..
إفراطك المدهش ف أيام عزلتك
وأنا اللي خارج من جيوب حنيتك
بضحك لأيامي اللي جاية
هكتب كده ..
خلاص هكتب كده ..
خارج حدود الشعر
بلا إلتزام بالمجازات العريضة
إثبات القدرات ف الكتابة
لينا شعرا يعملوا الحاجات دي أجمل مني الحقيقة
أما أنا ..
فهكتفي بسذاجة العاشق
وعشان "بحبك" هي أبلغ شعر يتقال عن بحبك
هقولها صافية مجردة
لو كان بإيدي يارب أتحول كمانجة
كان سعتها .. ممكن أصلب كتفها
وأقول بإني بحبها  مرة يارب وبعدها
أروح لحالي
ف بنت أبعد من خيالي
أقرب إليا من حبل الوريد
الشعر
يفعل ما يريده الشعر
والحب يفعل ف النهاية
ما يريد ..

الشتا ع الأبواب

الشتاء ع الأبواب ..

والحب .. 

الحب يا آنسة يحتاج لفارس وانا لست بفارس 

أو ربما .. 

كنت بالأمس فارس 

لكن الوضع تغير الآن .. 

أنني فارس هُزم ف معارك كثيرة فأصبحت لا أصلح لحرب جديدة ولا لأي علاقات جديدة ..

التلج ..
السما بتمطر تلج .. ع الورد .. تقل الورد وعوده انحنى .. دبل الورد واختفى ..

ذكريات ..
إنني أتجول ف أرجاء ذاكرتي بين الذكريات
الذكريات باقية .. رغم طول المدة
كـ كتب قديمة بالية
ولكن حِبُرها مازال واضح ويُقرأ .
أتجول وحدي
وحدي ..
تائه ..
ظلام تام
وسط فراغ شاسع
أشعر بضئل حجمي
كأنني لست مرئياً
والنوافذ مغلقة ..
أتخبط بين طفولتي .. وبين الحبيب الأول .. وسعادتي عندما كنت طفلاً .. وكيف كنت أريد أن أعيش حياتي وأن أغير العالم ولكن العالم هو الذي غيرني .. !!

القهوة ..
القهوة والبحر أصحاب
ايه السر ف حلاوة القهوة
رغم أنها مرة ؟!
وايه السر ف حلاوة البحر
رغم انه مالح ومبيرويش عطشان ؟!
السهر ..
السهر والتفكير
ف حنين وحاجات
باقيين من الشتا اللي فات ..

الجو ..
والجو برد
والليل طويل
ونسمة الهوا تعدي ع قلب السهران
تصحي فيه سيرة الأموات ..
ايه السر بإني دايماً أحن للغايبين وأتعلق بالأغراب .. ؟!
كأني بدور ع حد يشبهني ف حد لسه مجاش .

كن بخير

كن بخير..
لا يهمني الفراق..
فالحياة صدف..
وسنلتقي ذات يوم ف طريق عابر دون قصد منا ف لحظات..
ربما سأتظاهر أمامك بأني لا أراك..
وحتى إن نظرت ف عينك..
ربما سأتظاهر بالثبات..
وأنا لست ذلك، ولن أكون..

أريد سماع صوتك..
ذلك الصوت الذي يرتجف له قلبي..
اريدك ان تحضر أمامي وأتأمل ملامحك التي - رغم البعد الكثير - لا أنساها أبداً..
هناك من الكلام الكثير والكثير.. ولن أقول..
ف الصمت ف حرم الجمال جمالاً ..

كن بخير..
ليس لأجلي، بل لأجلك..
أعلم أن الفراق لا يزيد لهيب شوقك ولا يزيد أوجاعك ..
أعلم أنك لا تسهر الليالي تفكر في..
أعلم أنني لا أنقص حياتك، وأن قلبك لا يخفق عندما تسير تحت المطر..
وأعلم أنك لا تتذكرني عندما تنظر للقمر، رغم أنني أفعل..

أعلم تماماً..
بأن الحب كان من طرف واحد، ومازال..
وأن قلبي عنيدٌ  ف خطئه لا يتعلم سريعاً، وقلبك متعنت ف غيابه، لا يحنو كثيراً..
وأنني أهتممت أكثر مما ينبغي، وأنت لم تكن تبالي أكثر مما ينبغي..

لا مانع من الفراق..
فليست كل النهايات دائماً تكون سعيدة..
ولم يكن هناك بطل للقصة..
والقصة التي ليس لها بطل.. تُنسى..